హొలీ ల్యాండ్ (పరిశుద్ధ భూమి)నకు స్వాగతం

"శక్తిచేతనైనను బలముచేతనైనను కాక నా ఆత్మచేతనే ఇది జరుగును" - జెకర్యా 4:6.

మన మధ్యలో హొలీ ల్యాండ్(పరిశుద్ధ భూమి)ని నిర్మిస్తున్నవారు పరిశుద్ధాత్మ తండ్రి. ఇది పరలోకము నుండి వచ్చిన ఎందరో పరిశుద్ధులు పరలోక దర్శనాన్ని పొంది, ఆ పరమ తండ్రిలో నిమగ్నమయ్యే పరిశుద్ధ స్థలము. పరలోకము నుండి వచ్చిన ఎందరో ఈ భూమిపై లోకస్తులతో కలసి జీవన ప్రయాణం కొనసాగిస్తూ వుంటారు. వారికి తెలియనిది వారు పరలోకము నుండి వచ్చారని తమ పని ముగించి పరలొకములో చేరాలని. ఈ రహస్యము వారికి తెలిసేది "పరలోక దర్శనము" కలిగినప్పుడే. పరలోక దర్శనము కలిగే స్థలమే హోలీల్యాండ్(పరిశుద్ధ భూమి)."

మోషే 40 సంవత్సరములు ఐగుప్తు దేశములోనూ, 40 సంవత్సరములు మిద్యాను అరణ్యములోనూ సంచరించాకా 80 సంవత్సరముల వయస్సులో దేవుడు అతనిని మోషే! మోషే! అని పిలచి, నీవు నిలచినది హొలీ ల్యాండ్(పరిశుద్ధ భూమి) అని తెలిపి, పొదలో నుండి "పరలోక దర్శనాన్ని" ఇచ్చి ఇశ్రాయేలీయులకు నాయకునిగా పరమతండ్రి పనికి సిద్ధపరిచినది హోలీల్యాండ్(పరిశుద్ధ భూమి) నుండే. (నిర్గమ 3వ అద్యాయము)

పరలోకస్తుడైన యాకోబు తన జ్ఞానాన్ని నమ్మి పాలేరుగా మారాడు. ఎన్నో సంవత్సరములు ప్రయాసపడి ప్రాణభయంతో విసిగిపోయిన యాకోబుకు పరమ తండ్రి "పరలోక దర్శనాన్ని" ఇచ్చి భూమిపై నుండి పరలోకానికి నిచ్చెన చూపించాడు. యాకోబు ఇశ్రాయేలుగా మారాడు. ఆశీర్వదించబడిన జనాంగానికే మూలపురుషుడయ్యాడు. యాకోబు పరలోకదర్శనంతో ఇశ్రాయేలుగా మార్చబడిన స్థలమూ, పరలోకపు నిచ్చెన భూమిపై నిలిచిన స్థలమూ హొలీ ల్యాండ్(పరిశుద్ధ భూమి). (ఆదికాండము 28, 32 అధ్యాయములు)

మోషే చేతి క్రింద పనివాడు యెహోషువ. ఒక్కసారిగా ఇశ్రాయేలీయుల మీద నాయకుడిగా మార్చబడ్డ యెహోషువపై అన్యజనులను పారద్రొలి కానానును ఇశ్రాయేలీయులకు పంచవలసిన బాధ్యతను దేవుడే మోపాడు. భయంతో వణికిపోతున్న యెహోషువకు "పరలోక దర్శనము" కలిగింది. దేవునిదూత అతనితో నీవు నిలిచినది హొలీ ల్యాండ్(పరిశుద్ధ భూమి), భయపడవలసిన పనిలేదని చెప్పి ధైర్యపరచింది. ఆ పరలోక దర్శన స్థలమే హొలీ ల్యాండ్(పరిశుద్ధ భూమి). (యెహోషువ 3:13 నుండి 15 వరకు). బాబేలు నిర్మాణము పూర్తి కాలేదు. కారణం అది మానవ ఆలోచనా నిర్మితము. (ఆది 11:1 నుండి 9 వరకు). జెరుబ్బాబెలు పునాది వేసినా పని ఆగలేదు. కారణము అది పరిశుద్ధాత్మ తండ్రి జరిగించిన కార్యము. (జెకర్యా 4:6,7).

హొలీ ల్యాండ్(పరిశుద్ధ భూమి) నిర్మాణము మానవ శక్తి బలముల నిర్మితము కానేకాదు. పరిశుధ్ధాత్మ తండ్రియే దిగివచ్చి జరిగించుచున్న పరలోక దర్శన నిర్మితము, ఆద్యాంతము దైవ నిర్మాణము. హెవెన్ లైట్ మినిస్ట్రీస్ నకు చెందిన మేము, మా యొక్క విశ్వాసము దేవుని వాక్కు మీద ఆధారపడుతుంది. ఆదిలో దేవుడు చేసిన అనేక వాగ్దానాలలో ఏ ఒక్క వాగ్ధానము కూడా నిరర్ధకము కాలేదు. సాంకేతిక విప్లవం కొత్త పుంతలు తొక్కుతున్న ఈ దినములలో కూడా ఆయన చేసిన వాగ్దానాలను నెరవేర్చగల శక్తిమంతుడు. దేవుడు హొలీ ల్యాండ్(పరిశుద్ధ భూమి) నిర్మించియున్నాడు కనుక, మేము మరింత భక్తితో, మరింత ప్రార్థనతో, మరింత పరిశుద్ధతతో ఆ హొలీ ల్యాండ్(పరిశుద్ధ భూమి)లోనికి ప్రవేశించి ఆ పరమ తండ్రి ప్రసన్నతలో నిత్యమూ ఆనందించుచున్నాము.

హొలీ ల్యాండ్(పరిశుద్ధ భూమి) చిరునామా: హొలీ ల్యాండ్ (పరిశుద్ధ భూమి), డేగంపురం, గొల్లవానితిప్ప రోడ్, భీమవరం, పశ్చిమగోదావరి జిల్లా, ఆంద్రప్రదేశ్.